Tuesday, 11 January 2022

കുഞ്ഞാപ്



 1 -മുലക്കടവ് 






 പരുവം വെച്ച  നെൽചെടികളെ ചായ്ച്ചുകോതി വന്ന കാറ്റ് ,കുളക്കരയിലെ  ഉങ്ങുമരങ്ങളിലും  ഈറമ്പനയിലും
ഊഹ് ഊ ഹ് ഹ് ...എന്ന്
വട്ടം ചുറ്റി.

കാലങ്ങളുടെ ചെളിയും വിയർപ്പും രേതസ്സും പുരണ്ട് വടിപോലെ വെറുങ്ങലിച്ച തോർത്ത് തോള് മാറ്റിയിട്ട്
കുഞ്ഞാപ് ഒന്ന് കിഴക്കോറം  നോക്കി.

നേരം കേറിയിരിക്കുന്നു.

വർഷം നിറച്ച കാവലാം ചിറയുടെ സമൃദ്ധിക്ക് മേൽ വെയിൽ വീണ് തെറിച്ചു.
ഓവുചാലിന്റെ മൂലക്കുള്ള കടവിൽ  പെണ്ണുങ്ങൾ തുണിയലക്കുന്ന ശബ്ദം.
എതിർകരയിൽ  ഇരട്ടപൊട്ടി അത്‌ പ്രധിധ്വനിക്കുന്നു.

വൈകിയിട്ടില്ല!,
അവന് കുളിർത്തുകയറി.

എരിക്കിൻ ചെടികളെ മാടി  കന്നാലിക്കുളമ്പ് പറ്റി കിടക്കുന്ന ചെരിവിലൂടെ കുഞ്ഞാപ്പ് പാറക്കടവിലേക്ക് നടന്നു.

ആളനക്കമില്ലാതെ ഒഴിഞ്ഞു കിടക്കുന്ന  കടവ്.

ജലപ്പരപ്പിൽ തിണർത്തു കിടക്കുന്ന  മുള്ളം ചണ്ടിക്ക് മേൽ ,
ഒന്നുരണ്ട് ഈർക്കിലിക്കാലൻ പക്ഷികൾ തുമ്പിപ്പുഴുക്കളെ കൊത്തിപ്പെറുക്കി   നടക്കുന്നു .

എത്രകാലമായിക്കാണും,കുഞ്ഞാപിന്റെ ഈ നേരം തെറ്റിയ  കുളി?!

ആർക്കും ഓർമ്മയില്ല !
അല്ലെങ്കിൽത്തന്നെ അതിലെന്തിരിക്കുന്നു..

മുല്ലന്റെ ഭാര്യ കൊച്ചേയി,
ആട് നോക്കാൻ പോണ ഓമല,ബീഡി തെരപ്പ് കാരി  സുമ,,,എല്ലാവരുടെയും  മുലവ്യതിയാനങ്ങളെ ക്കുറിച്ച് തിട്ടമുള്ളവനാണ് അവൻ.

കുഞ്ഞാപിന്റെ ഉള്ളിൽ ഓരോരുത്തരുടേയും മുലകൾക്ക് ഒന്നിലേറേ  പ്രതീകങ്ങളുണ്ടായിരുന്നു.

ആട് നോക്കാൻ പോണ ഓമലയുടെ 
മുലകൾ ആനപ്പാറ തന്നെ.

കോഴിമുക്കിലെ മലഞ്ചെരിവിലേക്ക് തലകീഴായി ഞാന്നുകിടക്കുന്ന ആനപ്പാറ.

സുമേച്ചീടേത് ,
ലാസ്‌റാപ്പ്ളെടെ വീട്ടിലെ വാഴകൊടപ്പൻ,
ഉത്തരത്തിൽ  വിത്തിന് തൂക്കിയിട്ട  കുമ്പളങ്ങയാണ് ലീലേൻറെ.
കണ്ട മുലകളെല്ലാം
അങ്ങനെ, പ്രതീകങ്ങളായി  അവനെ അനുധാവനം ചെയ്തു.

കുംഭാരക്കോളനിയിലെ പെണ്ണുങ്ങൾ,ഉമിക്കുന്നിലെ പെണ്ണുങ്ങൾ,മണ്ടം പറമ്പിലെ പെണ്ണുങ്ങൾ...
കുളിക്കടവിലെ ഓരോ പെണ്ണുടലും കുഞ്ഞാപിന് 
പൂവും  കായും കനിയും നിറഞ്ഞ  തരുക്കളായി.
അതിൽ അവന് മാത്രം കാണാവുന്ന  ഋതുക്കളുണ്ടായിരുന്നു,
അവയിൽ അവൻ കാണാത്തതായ  ഋതുക്കൾ അപൂർവ്വവുമായിരുന്നു.

തുടരും 






No comments:

Post a Comment

അഭിപ്രായമുണ്ടോ....?