Sunday, 29 December 2019

തെറിപ്പാട്ട്



പാഴായ യാത്രകളോരോന്നും എണ്ണി പറഞ്ഞ്
കലഹിക്കുന്ന കാൽപാദങ്ങളോട്

ദൂരങ്ങളിൽ ഒളിഞ്ഞിരിക്കുന്ന
കളവുകളെക്കുറിച്ച് പിറുപിറുത്ത്
മുഷ്‌ടി ചുരുട്ടുന്നു
താളം തെറ്റി വീശുന്ന കൈകൾ.

വഴിക്കാറ്റ് കടന്നു പോകുന്ന തുള വീണ നെഞ്ചിലേക്ക്
കുനിഞ്ഞു തൂങ്ങുന്ന ശിരസ്സുണ്ട്,
തനിക്കൊന്ന് ചായണമെന്ന് ചിണുങ്ങുന്നു..

വേപഥു പൂണ്ട മനസ്സു പരതുന്നു
ആരും തീണ്ടി ഈണം ചോരാത്ത തെറിപ്പാട്ടിലൊന്നിനെ.

പിന്നിട്ട വഴികളത്രയും ചുരുട്ടിയെടുത്തത്
ചുമടായി കനക്കുമ്പോൾ,
എടുത്ത് നിവർത്തി ഒന്നുറങ്ങാം'
എന്നൊരു ക്ഷണമുണ്ട്
കരിമ്പനച്ചോട്ടിൽ
നിലാവുടുത്ത്
നൂറും തേച്ച് വിളിക്കുന്നു...

Friday, 13 December 2019

ഗുരു മൊരിഞ്ഞത്





"ഗുരോ"???...

പിൻകാലുകളിൽ ചുരമാന്തി
കുതിക്കാനായുന്ന..
ചൊറിപിടിച്ചൊരു തെരുവ്  നായോട്

"ആഹാ" 

എന്നൊരു കൊതിയുണ്ടെനിക്ക്..


"ഉം".. .....
എന്നൊരു മൗനത്തിന് തുടക്കമിട്ട്

താരനിളക്കി ത്താടി ചൊറിഞ്ഞ്

ഗുരു മൊരിഞ്ഞു*...


കൗപീനം കെട്ടാത്തവന്റ 
മൂടുകീറിയ മുണ്ടാവണം
മനസ്സ്.........

കവലപ്രസംഗിയുടെ വായിൽ  പിഴച്ച് പെറ്റ തെറിയാവണം
വാക്ക്...... ....


"നോക്ക്",
പരാസനത്തിലേക്ക്  അറിയാതെ
തെറിച്ചു കുത്തുന്ന
കോങ്കണ്ണും"...


ചൊറിപിടിച്ചൊരു തെരുവ്  നായുണ്ട്...

"ആഹാ" 
എന്നൊരു കുതി കുതിക്കുന്നു!!!