Sunday, 11 December 2011

വെളിപാടിന്റെ മൂന്നാം നാള്‍














വെളിപാടിന്റെ മൂന്നാം നാള്‍

അര്‍ജ്ജുനവിഷാദയോഗം

നൂറ്റൊന്നാവര്‍ത്തിച്ച്

കമണ്ഠലു കമഴ്ത്തി

വസനങ്ങളിലവസാനത്തേതുമഴിച്ചുമാറ്റി

ആചാര്യന്‍

ചമതമേഞ്ഞ പൂര്‍വ്വാശ്രമവാതിലടച്ചു.

ബ്രഹ്മചര്യത്തിലര്‍ധവിരാമിയായ

ജ്ഞാനതൃഷ്ണയുടെ ശമനതാളങ്ങള്‍ക്ക്

സന്നിപകരാന്‍

അകത്ത്,

വിരിച്ച ദര്‍ഭമേല്‍

അനാവൃതയായി അധരം വിയര്‍ത്ത്,

അറിവിന്റെ ആ രതിയൊരുക്കി

അവള്‍

അനുയായിയായിരുന്നവള്‍ക്ക്ശിഷ്യപ്പെട്ട്

ആചാര്യന്റെ അനുധാവനം

പൂര്‍ണ്ണജ്ഞാനത്തിലേക്ക്...






Sunday, 20 November 2011

പതിവുപോലെ.....







 ഒരു,താന്നിക്കുരു,

വെയില്‍വഴിയിലെന്നെക്കാത്ത്  കിടക്കും,

ഇല്ലിവേലിയില്‍ ഞാന്‍

ഉറക്കത്തുമ്പികളുടെ തോരണങ്ങള്‍കാണും,

യുഗാന്തരങ്ങള്‍ത്താണ്ടി

നരവീണ് വിണ്ട മാവിന്‍കൊമ്പില്‍

കാക്കകളന്നെ വിരുന്നു വിളിക്കും,

ചീവീടുകള്‍നീട്ടിപ്പാടും...

കുന്നിന്മുകളില്‍ന്നിന്ന്,വേങ്ങമരത്തിന്റെ

തളരിലകള്‍ ഉലഞ്ഞ്പറക്കുന്നൊരു

കാറ്റ്,എന്റെപ്രാണനോട് ചേരും..

അപരാഹഹ്നങ്ങളില്‍

 വാത്സല്യ മധുരമേറിയ

കടുംകാപ്പിനുണഞ്ഞ്

ഉമ്മറത്തിണ്ണയില്‍കാല്‍കയറ്റിയിരിക്കെ,

തേക്കിന്‍ തലപ്പുകള്‍ക്ക് മീതെ

അകലെ

യൂക്കാലികള്‍ കാവടിയാടുന്ന

കാടിന്റെ നെറുകിലിറങ്ങാന്‍

മിഴികള്‍ക്ക് മുന്‍പെ പറക്കും,

കുന്നിന്‍പുറമേറിപ്പുണര്‍ന്ന് നില്‍ക്കുന്ന

ഈറമ്പനകളില്‍ മയിലുകള്‍

ചേക്കേറുന്ന സന്ധ്യക്ക്,

വയലിലെ കാവല്‍മാടങ്ങളില്‍,

ശരറാന്തലുകള്‍ തെളിയാന്‍ തുടങ്ങന്നത്

ഞാന്‍ കാണും

നിലാവുമുക്കിയുടുത്ത്,മുട്ടോളം മുടിയഴിച്ചിട്ട്

എന്റെ മുറിക്കുപുറത്തെ പ്ലാവിന്‍ ചോട്ടില്‍

കഥകളിറങ്ങിവന്നവര്‍ കാത്തുനില്‍ക്കെ

പലവുരുചൊല്ലിനാവോടുചേര്‍ന്ന

സന്ധ്യാനാമങ്ങളും ഞാനും

ഒരേപുതപ്പിനടിയില്‍ വീണ്ടുമുറങ്ങും....

പതിവുപോലെ.....


Sunday, 4 September 2011

മണ്ണ് തിന്നുന്നവര്‍ക്ക്










എനിക്ക് വെറുപ്പാണ്
ഇനി വിശക്കും വരെ,

രുജിയടക്കുകളില്‍ മേദസ്സൊളിപ്പിച്ച
ബര്‍ഗ്ഗറിന്‍ മൃദുത്വം...



അവസാനതുള്ളിക്കുശേഷവും
ഏമ്പക്ക ചോദ്യ മെറിയും 
പെപ്സിതന്‍ കുളിര്‍..


നിറവയറിലിടം തേടിത്തോറ്റ്
തണുത്തുതളരുന്ന
ഫ്രഞ്ച് വറവിൻ കൂടിനെ..

കാരണമെന്തെന്നൊ?
ദൂരെ
ഏതൊ നാട്ടില്‍
ആരൊ മണ്ണ്തിന്നുന്നത്രെ!!



ക്ഷീരമൂറാത്ത മാറിൽ
വിശപ്പുചപ്പുന്നത്രെ
ശൈശവങ്ങളന്നാട്ടില്‍

എന്ത്‌ ചെയ്യാൻ??

ഇടനേരമൃഷ്ടാനമേശയി-
ലുറക്കെ,ഉല്‍ക്കണ്ഠിക്ക,

ദൂരെ ഏതൊ നാട്ടില്‍

ആരൊ മണ്ണ് തിന്നുന്നത്രെ ,കഷ്ട്ം !



Saturday, 23 April 2011

ചക്കിക്ക്


ചത്ത മുണ്ടനെ തലച്ചൂടായി കൂട്ടി
വെയിലില്‍ കുളിരുപൊട്ടി
ചൂലരിയാനിറങ്ങുന്ന ചക്കിക്ക്    
ഒരു വാവിനുച്ചിയില്‍      
മുണ്ടന്റെ വിളി വന്നു
യൗവ്വനം കടഞ്ഞ്
വാര്‍ദ്ധക്ക്യത്തിലെത്തിയ
വൈധവ്യം, നീട്ടി ത്തുപ്പിയ
ഒരു  നിശ്വാസത്തിലൊടുക്കി
ചക്കി കണ്ണടച്ചു.
ഇടവഴികള്‍ തേഞ്ഞ് ചേര്‍ന്ന പാദങ്ങളെ
പെരുവിരലില്‍ കൂട്ടിക്കെട്ടി,
വാസനപ്പൊകല പുരണ്ട
കത്തുന്ന തെറികളെ
താടി ചേര്‍ത്തടച്ച്
കാലന് അമ്മളി പറ്റാതെ കാത്തു..
കാത്തിരുന്നവര്‍.



അടിക്കുറിപ്പ്

അച്ചമ്മയുടെ സമ്പന്നമായ മുറുക്കാന്‍ ചെല്ലം മോഹിച്ചു ചക്കി വന്നിരുന്ന വേനല്‍ മധ്യാഹ്നങ്ങളില്‍, എന്റെ പകലുറക്കങ്ങളെയാണ് ഇരുവരും  നാലും കൂട്ടി മുറിക്കി തുപ്പിയിരുന്നതെങ്കിലും അവരുടെ പഴമ്പുരാണങ്ങളില്‍  കഥയും കാലവും ജീവതവുമായി രമിക്കുന്നത്    ഏറെ    കണ്ടിരുന്നിട്ടുണ്ട് ഞ്ഞാന്‍

Monday, 18 April 2011

കടലോര്‍മകള്‍




കാലടികളില്‍ കടല്‍ നിറച്ച്
തിരികെപ്പോയൊരു തിരയോട്
ഞാനെന്റെ ഓര്‍മകളെ
തിരികെ ചോദിക്കവെ
ഉപ്പളങളിലെവിടെയൊ
വെള്ളപുതച്ചുകിടന്ന
കടലിന്റെ മാറിലെ
ഉറയാത്ത ഒരു തുള്ളി
കണ്ണുനീര്‍ നീട്ടി
തിരയെന്റെ കനവിലും
കടല്‍ നിറക്കുന്നു

Sunday, 17 April 2011

അരയാലിലയിലെ പ്രണയം

ഉറിയിലൊളിപ്പിച്ച പ്രണവം
കുടമുടച്ച്പകുത്ത്നല്‍കാന്‍,
ധര്‍മസംസ്ഥാപനതിന്റെ ഒളിയമ്പേറ്റവന്
തുല്ല്യനീതിയിലേക്കു
തിരികെ തൊടുക്കാനായ്
അസ്ത്രവും ലക്ഷ്യവുമാവാന്‍
പ്രണയമുടലാര്‍ന്നവന്‍.
നിത്യതയിലേക്ക്തുറന്ന
മയില്‍പീലിക്കണ്ണിലെ...
പ്രളയജലധിയില്‍
പ്രണയം പേറി
ഒരരയാലില.